داخستن
بەرنامە کاتی پەخش دووبارە
هەواڵى سياسى 10:00 + 12:00 + 14:00 + 17:00 + 18:00 + 19:00 + 20:00 + 22:00 + 23:00 + 23:45
هەواڵی وەرزشی 10:30 + 13:00 شيكارى وەرزشی + 18:30 + 23:30
ئەمرۆ 10:10 شەو، جگە لە رۆژانی هەینی 03:00 نیوەرۆِی رۆژی دواتر
داخستن
كاته‌كانی بانگ به‌پێی شاری هه‌ولێری پایته‌ختی هه‌رێمی كوردستان
بەیانی 3:17
نیوه‌ڕۆ 12:17
عه‌سر 4:05
ئێواره‌ 7:29
خه‌وتنان 8:44

لەبارەی هەڵکوتانە سەر دەزگای ستاندەر..

هاوژین عومەر کەریم

دەزگای ستاندەر هەر لە سەرەتای دامەزراندنیەوە، یەکێک بووە لەو دەزگا گرنگانەی توانیویانە خاوەنی چاوێکی تیژ و دەنگێکی دلێر و بیرێکی فراوان و بوێرییەکی زۆر بن بۆ لێکدانەوە و شرۆڤەکردنی بارودۆخی سیاسی و ئابووریی و دۆخی پڕ لە قەیرانی هەرێمی کوردستان..

کارەکتەرەکانی پشت ئەم دەزگایە، هەمیشە کەسانی خاوەن هەڵوێست و بوێر و پەیامدار بوون، بەتایبەتیش خاوەندارەکەی، کە بریتییە لە مامۆستا مەسعود عەبدولخالق و ئەندامانی دیکەی وەکو کاکە فەرمان ڕەشاد.

ئەو ڕەفتارەی کە دوێنێ (چوارشەممە) هێزە ئەمنییە بەناوحکومییەکانی سەر بە پارتی دیموکراتی کوردستان لە شاری هەولێر نواندیان، لە هەڵکوتانە سەر بارەگای دەزگاکە و داخستنی و ڕێگرییکردن لە سازکردنی سیمینارێکی تایبەت بە ئاڵۆزییەکانی شەنگال، تا ئەوپەڕی دواکەوتوویی و لەرزۆکی و شپرزەیی ئەو دەسەڵاتە دەسەلمێنێت، هەروەک بوویە شانازییەکی دیکەش بۆ دەزگای ستاندەر و ئەندامەکانی..

ئەگەر ئەو سیمینارە بە هێمنی و دوور لەو ڕەفتارەی هێزە ئەمنییەکان بەڕێوە بچوایە، تەنها ئامادەبوان سەداکەیان دەبیست و دەنگۆیەکی ئەوتۆی لێنەدەکەوتەوە، بەڵام ڕەفتارە نەشیاوەکەی ئەو دەسەڵاتەی هەولێر، کاردانەوەی جیاواز و خراپتری بۆ خۆی هێنایە ئارا، بەوەی دەیان جاری دیکە ئەو دەزگایەی گەورەتر کرد لە دڵی کەسانی ئازادیخواز و دامودەزگا پەیوەندیدارەکانی ناوەوە و دەرەوەی وڵات.

ئەو دەسەڵاتە بە ڕەفتار و هەڵوێستەکانی دەیسەلمێنێت، کە دوای زیاتر لە چارەکە سەدەیەک لە حوکمڕانی، خاوەنی هیچ بەهایەکی جوانی فەرمانڕەواییکردن نییە، پەرلەمان لەکار دەخات، شەڕی کوردکوژیی دەکات، سەروەت و سامان بەتاڵان دەبات، هەڵبژاردن دوادەخات، ئاشتیی کۆمەڵایەتی تێک دەدات، دەروازەکانی ئازادیی بەرتەسک دەکاتەوە، فرەلایەنیی سیاسی تێکدەدات.. سەرتاپای ڕەفتارەکانی هیوابەخش نین و خۆی جاڕی مەرگی خۆی دەدات..

ئێستا لە هەرکاتێکی دیکە زیاتر پێویست دەکات کە لە پێناوی ئایندەی گەشی ئەم هەرێمە، فشاری جەماوەریی و سیاسی و ڕێکخراوەیی لەسەر ئەم دەسەڵاتە خێڵەکییە دروست بکەین، تاوەکو ناچار بە بەخۆداچوونەوە و خۆڕاستکردنەوەی بکەین.. چی دیکەش ڕەوا نییە خەڵک و هێز و ڕێکخراوەکان دەستەوستان دانیشن بەرانبەر ئەو ڕووداوە نەخوازراوانەی بەتایبەت لە شاری هەولێر ڕوودەدەن، هەر لە تیرۆرکردن و بەرتەسککردنەوەی ئازادییەکان و پەکخستنی دامودەزگاکان و تێکدانی ئاشتیی کۆمەڵایەتی و هتد..

ئەگەر دەسەڵات پێی وایە بەو ڕەفتارانەی دەنگی ناڕەزایی لەسەر ئاستی جەماوەر و ڕێکخراوەکان کپ دەکات و کەشێکی لەبار بۆ خۆی دەڕەخسێنێت، ئەوە بە دڵنیاییەوە بەهەڵە تێگەیشتووە.. دەسەڵاتێک ناتوانێت تا سەر بەردەوام بێت ئەگەر هەمیشە لە شەڕدا بێت لەگەڵ هەموو کەسایەتی و کارەکتەرە ئیجابییەکانی نێو کۆمەڵگەکەی خۆی و تەنها خۆشیی لە کەسە هەلپەرست و دواکەوتووەکان بێت..

413 جار خوێندراوەتەوە
16/03/2017

هەموو وتارەکانی ئەم نوسەرە